 |
អ្នកស្រី សេង តក្កនារី ប្រធានសមាគមសហគ្រិនស្រ្តីកម្ពុជា
ក្នុងបទសម្ភាសជាមួយ ភ្នំពេញ ប៉ុស្តិ៍ កន្លងមក។
|
ភ្នំពេញៈ សហគ្រិនស្រ្តីកម្ពុជានឹងទទួលបានការ លើកទឹកចិត្តកាន់តែខ្លាំងពីរដ្ឋាភិបាល និងប្រទេសមហាអំណាចសេដ្ឋកិច្ច ដើម្បីបង្កើនវត្តមានកាន់តែខ្លាំង ក្នុងសកម្មភាពពាណិជ្ជកម្មក្នុងគោលដៅលើកកម្ពស់អំណាចផ្នែកសេដ្ឋកិច្ចដល់ស្រ្តី។ ការលើកទឹកចិត្តនេះនឹងធ្វើឡើងតាមរយៈការផ្តល់ជូនវគ្គបណ្តុះបណ្តាលជំនាញ ក្នុងវិស័យជំនួញដល់ស្ត្រី។ តំណាងស្ថានទូតនៃប្រទេសមហាអំណាចពីរនៅកម្ពុជាគឺសហរដ្ឋអាមេរិកនិងជប៉ុន កាលពីម្សិលមិញបានរៀបចំសិក្ខាសាលារួមគ្នាជាលើកដំបូងដោយផ្តោតលើការបណ្តុះគំនិតសហគ្រិន ដើម្បីបង្កើនអំណាចសេដ្ឋកិច្ចដល់ស្រ្តីនៅប្រទេសកម្ពុជា។ នេះគឺជាផ្នែកមួយនៃកិច្ចសហការថ្នាក់តំបន់
និងកម្រិតសកល រវាងប្រទេសមហាអំណាចទាំងដែលបានកំណត់ឡើងកាលពីខែមេសាឆ្នាំ ២០១៤
ដោយលោកប្រធានាធិបតីសហរដ្ឋអាមេរិក បារ៉ាក់ អូបាម៉ា និងលោកនាយរដ្ឋមន្រ្តីជប៉ុន
ស៊ីនហ្សូ អាបេ។ លោកស្រី Julie Chung ភារធារីនៃស្ថានទូតអាមេរិកប្រចាំកម្ពុជា បានលើកឡើងកាលពីម្សិលមិញថា ដើម្បីសម្រេចបេសកកម្មក្នុងដំណើរការសេដ្ឋកិច្ចឲ្យមានកំណើនប្រកប ដោយចិរភាព និងកាត់បន្ថយភាពក្រីក្រ ការជំរុញឲ្យស្រ្តីចូលរួមកាន់តែច្រើនក្នុងសកម្មភាពពាណិជ្ជកម្មនិងសេដ្ឋកិច្ចគឺជាយុទ្ធសាស្រ្តគន្លឹះ។លោកស្រីថ្លែងថា៖ «ភាពជាសហគ្រិនជាចលករសម្រាប់កំណើនសេដ្ឋកិច្ច ជាប្រភពនៃការរីកចម្រើន និងជាវិធីដើម្បីរក្សាភាពជោគជ័យក្នុងវិស័យពាណិជ្ជកម្ម»។ លោកស្រីបានបន្ថែមដោយស្រង់សម្ដីលោក
អូប៉ាម៉ា ថា ការលើកកម្ពស់ស្រ្តីក្នុងវិស័យជំនួញគឺជាភាពត្រឹមត្រូវ ហើយក៏ជាយុទ្ធសាស្រ្តអភិវឌ្ឍន៍ដ៏ឆ្លាតវៃមួយផងដែរ ព្រោះនៅពេលដែលស្រ្តីជោគជ័យប្រទេសជាតិទំាងមូលកាន់តែមាន ស្ថិរភាព សុវត្ថិភាព
និងកាន់តែមានភាពចម្រុងចម្រើន។ លោកស្រីបន្តថា៖ «នៅពេលស្រ្តីចូលរួមក្នុងសកម្មភាពសេដ្ឋកិច្ច និងមានចំណូលកើនឡើង ពួកគេនឹងចំណាយបន្ថែមទៅលើអាហារដែលមានសុខុមាលភាព វិនិយោគបន្ថែមលើការអប់រំសម្រាប់ខ្លួនឯង
គ្រួសារ និងបង្កើនប្រសិទ្ធភាពក្នុងការចូលរួមក្នុងកំណើនសេដ្ឋកិច្ច»។ តាមលទ្ធផលអង្កេតចន្លោះជំរឿនសហគ្រាស
២០១៤ របស់ក្រសួងផែនការចេញផ្សាយកាលពីខែកុម្ភៈ
កម្ពុជាមានសហគ្រាសសរុប ៥១៣ ៧៥៩ នៅទូទាំងប្រទេសគិតត្រឹម ខែមីនា ឆ្នាំ២០១៤ កើនឡើង១១ភាគរយពីចំនួន
៤៦៣ ៣៦៣ កាលពី ឆ្នាំ២០១១។ ក្នុងនោះសហគ្រាសប្រមាណ ៦០ ភាគរយគ្រប់គ្រង និងដំណើរការដោយស្រ្តី។ របាយការណ៍ក៏បានបង្ហាញដែរថាសហគ្រាសនៅកម្ពុជាបានរីកធំឡើងជាងមុននូវទំហំប្រតិបត្តិការបើធៀបនឹងបួនឆ្នាំមុនដោយបានរកឃើញពីកំណើនគួរឲ្យកត់សម្គាល់នៃសហគ្រាសដែលមានមនុស្សធ្វើការច្រើននាក់។ លោកស្រី ច័ន្ទ សូរីយ៍
រដ្ឋលេខាធិការក្រសួងកិច្ចការនារី បានប្រាប់ក្រុមអ្នកយកព័ត៌មានកាលពីម្សិលមិញថា ចំនួនស្រ្តីចូលរួមក្នុងវិស័យជំនួញហាក់បានកើនឡើងធៀបនឹងកាលពី ប្រាំឆ្នាំមុន តែភាគច្រើនស្ថិតនៅក្នុងប្រភេទអាជីវកម្មខ្នាតតូចនៅឡើយ។ លោកស្រីថ្លែងថា៖«បញ្ហាការទទួលបានចំណូលទាប និងចំណេះដឹងមានកម្រិតទាបនៅតែជាបញ្ហាប្រឈមខ្លាំងសម្រាប់ការ អភិវឌ្ឍភាពជាសហគ្រិនស្រ្តី»។ អ្នកស្រី សេង តក្កនារី
ប្រធានសមាគមសហគ្រិនស្រ្តីកម្ពុជាបានលើកឡើងភាពជាសហគ្រិនស្រ្តីនៅកម្ពុជា កំពុងវិវត្តទៅរកភាពប្រសើរឡើងប៉ុន្មានឆ្នាំចុងក្រោយនេះដោយសារចំនួនស្រ្តីចូលរួម ក្នុងសកម្មភាពពាណិជ្ជកម្មបានកើនឡើងយ៉ាងខ្លាំងជាពិសេសសហគ្រិន ស្រ្តីវ័យក្មេង។
សមាគមដែលមានសមាជិកជាង ២០០ នាក់ មានសុទ្ធសឹងជាសហគ្រិនជាស្រ្តីដែលកំពុងវិនិយោគលើ ២៦ប្រភេទអាជីវកម្មផ្សេងៗគ្នា។ អ្នកស្រីអះអាងថា៖ «ស្ត្រីវ័យក្មេងគាត់មានភាពក្លាហាន មានទំនុកចិត្តខ្លួនឯងក្នុងការធ្វើអាជីវកម្ម។
ក្មេង គាត់លឿន គាត់ចង់ធ្វើអ្វីដែលលេចធ្លោដើម្បីជោគជ័យហើយគាត់មានចំណេះដឹងនិងការយល់ដឹងពីបច្ចេកវិទ្យាខ្ពស់»៕
No comments:
Post a Comment